【明報專訊】立法會主席曾鈺成噚日出席海港青年商會舉辦嘅青年論壇，上星期曾主席唔肯評論建制派「甩轆」令政改僅得8票支持一事，但佢噚日致辭時，就講點樣可以成為優秀嘅領袖，佢以政改表決做例子，暗諷建制派表現。 曾：遇突發情况 須保持鎮定 曾主席話，一個優秀嘅領袖要具備良好溝通能力、決斷力同應變能力。佢話領袖要同自己嘅團隊好好溝通，否則就算設計得好好嘅活動都會出錯。聽到呢度，在座嘅青年領袖同嘉賓已經忍唔住笑，曾主席仲要反問大家佢係咪講咗笑話。 曾主席認為好領袖就算做錯決定，都唔可以將責任推卸畀其他人。唔知大家有無諗起建制派互相指摘嘅情景呢？最後提到領袖應變能力時，曾主席話即使計算過嘅表決時間，都會因為議員突然唔講嘢而提早，正趕來嘅議員亦會因為塞車遲到，佢以此告誡在座各位，面對突發情况時，一定要保持頭腦清醒同鎮定。 睇番建制派嘅甩轆事件，似乎無乜邊個可以做到曾主席心目中嘅優秀領袖，相信建制派議員亦汲取咗沉重教訓㗎喇。
|
| |
| |
;){kind=small}
;)
