【明報專訊】香港中樂團嘅內訌沒完沒了。高胡首席辛小玲、二胡首席辛小紅、中胡首席劉揚3人原本應中樂團管方安排，噚日朝早出席特別委員會解釋佢哋嘅指控，但當管方見到3人帶埋律師赴會時，就唔准佢哋入會議室，話事先冇收通知會有律師出席，結果個解釋會開唔成。3個首席團員又嘗試「拍卡」去排練室，但發現團員卡失效，「闖關」失敗。

見面泡湯 明日再會

辛小玲等3人好不滿，中午同記者講，話中樂團理事會嘅做法係違反程序公義，一來未調查佢哋嘅指控，理事會已經定性咗佢哋指控失實，二來喺冇理據下停止佢哋排練工作，對佢哋唔公平。

中樂團安排咗聽日(周三)再見面，但辛小玲講到明要公開公正咁傾先至肯赴會，唔接受呢種內部閉門會議安排。中樂團理事會主席徐尉玲就解釋，暫停排練唔係停職，管理層會安排其他工作畀佢哋，至於點解唔畀排練，佢話因為要澄清佢哋嘅指控，先至可以繼續合作。