【明報專訊】學聯代表同政府官員前晚嘅「世紀對話」，學聯五子嘅表現獲得唔少掌聲，除咗學聯秘書長周永康(Alex)同副秘書長岑敖暉(Lester)之外，網民大讚常委女將梁麗幗(Yvonne)巾幗不讓鬚眉，與港大法律學院師兄嘅律政司長袁國強就法律觀點針鋒相對。有網民搵番3年前Yvonne參加中學校際辯論比賽、贏得「最佳辯論員」嘅短片，盛讚佢前日都係「最佳辯論員」。Emily噚晚見段片已經有5.6萬觀看次數。 短片係2011年嘅全港中學辯論比賽總決賽，辯題係「港府復建居屋利多於弊」，當年讀協恩中學、穿著校服嘅Yvonne係反方結辯，除咗喺自由辯論環節贏得台下掌聲，總結發言都精彩，「就如今天政改，政府提出嚟都係為市民好，但當千呼萬喚始出來，原來係一個翻叮嘅方案」，闡述若不顧居屋政策執行細節，即使理念係好，都係不思進取。最後Yvonne代表嘅反方以6比1勝出奪冠。 葉劉評Yvonne表現：較偏激 新民黨主席葉劉淑儀前晚亦有睇對話，佢形容政改三人組嘅表現稱職，整體評分有80分，至於被網民形容表現「最好」嘅政制及內地事務局副局長劉江華，葉太話佢「無表現到」。 至於學生表現，葉太話整體有85分，表現最好係Alex，佢形容對方流利、真誠，但講有女仔預咗中子彈就誇張咗喇；Lester表現亦唔錯，不過佢就覺得Yvonne比較偏激，理據唔係好夠。
|
| |
| |
;){kind=small}
;)
