【明報專訊】前排有個高登仔買到iPhone 5s，因為太興奮，即刻喺網上post咗張單，但就唔小心公開埋自己全名、身分證同信用卡號碼，身陷被起底危機。點知噚日Emily喺facebook都見到類似嘅嘢，民主黨副主席羅健熙將稅單上載facebook，雖然張稅單得羅健熙個全名，無地址亦無身分證號碼，不過就透露咗原來佢兩期共要交3萬幾蚊稅。

講起交稅，好多人都會避忌唔肯講，Emily估唔到羅健熙咁公開透明、開誠布公。不過，區議員薪酬有幾多都係公開資料，如果無其他正職，每個月靠2.3萬元嘅津貼，有時都有啲難捱。