【Emily】前民政局副局長 陳積志任申訴專員

[2024.03.02] 發表

【明報專訊】前民政事務局副局長陳積志(圖)4月起接替趙慧賢做申訴專員，為期5年。陳之前喺政府做事近40年，做過公務員事務科、保安科、教資會、工務局、環境運輸及工務局、發展局等，2022年離開政府前係署理民政事務局長。

曾捲洪門宴事後道歉「唔夠敏感」

陳積志做民政局副局長時曾捲入「洪門宴」風波，喺新冠疫情期間出席洪為民生日會，事後時任特首林鄭月娥話陳負責青年工作，同洪為民有工作聯繫，出席宴會可以理解，而且逗留時間短，唔存在紀律問題。陳事後發道歉聲明，話自己唔夠敏感。之後局長徐英偉因呢場風波請辭，陳就署任局長。

特首李家超讚陳積志有卓越嘅領導才能、果斷嘅決策能力、豐富嘅公共行政經驗，有信心佢可以帶領申訴專員公署繼續履行法定職能。

至於曾任警務處副處長嘅現任申訴專員趙慧賢，任期本月底屆滿，政府噚日出新聞稿，李家超以簡短三句祝佢離任後生活愉快。

睇番上一任申訴專員劉燕卿離任時，林鄭月娥花咗較多篇幅讚賞同感謝劉，話佢領導出色，公正持平嘅工作得到廣泛認同，團隊嘅卓越成就享譽國際。

更多港聞

【明報專訊】香港迪士尼樂園噚日舉行美食巡禮，介紹將會推出嘅避風塘特色美食等，向旅客推廣港式風味。傳訊及公共事務副總裁黎珮珊話樂園過去一年同今... 詳情

【明報專訊】香港工程師周嘉年華噚日起一連3日喺西九文化區海濱草坪舉行。發展局長甯漢豪主持開幕禮後就同其他嘉賓行咗幾圈，其間來自深井天主教小學... 詳情