【Emily】球星畀足面 簽名球衣贈特首 握手擁抱邀捧盃 李：波衫「獻畀港球迷」
[2024.02.14] 發表
【明報專訊】球王美斯月初訪港友賽缺陣，頒獎禮時更繞過特首李家超無同佢握手同領獎牌，引起熱議。不過噚日賀歲盃，同樣擔任頒獎嘉賓嘅李家超唔止同咁多位世界級球星握手，仲深入更衣室拎齊17個球星簽名。
賀歲盃由世界明星隊以7：3擊敗香港明星隊，賽後喺看台上嘅頒獎禮，李家超同眾球星逐一握手，更擁抱英格蘭前國家隊門將占士等球星。世界明星隊隊長、曾代表意大利奪得世界盃嘅馬特拉斯亦相當識做，邀請李一齊舉起獎盃。
李家超中場休息時更走入更衣室，17位球星一齊喺波衫上簽名送畀佢，李家超喺facebook話件波衫係「獻畀香港球迷」。佢話部分球星帶埋家人來港，賽後會留低遊覽，又引述利物浦前隊長希比亞話遲啲會再嚟香港睇七欖。李又話，政府會繼續同社會各界共同推動盛事經濟，務求加倍發揮「磁石效應」，帶動旅遊、酒店、餐飲同零售業等發展。
鄭泳舜捧意名宿 狄志遠讚李華度好波
唔少政界中人亦有入場睇波。民建聯議員鄭泳舜話自己入場捧意大利名宿迪比亞路同托迪，大讚二人「好靚仔」，本地球員如「陳七」陳肇麒都係佢捧場對象。佢話現場好開心好熱鬧，盛讚一眾球星腳法好。孖黨友一齊入場觀戰嘅新思維狄志遠話，最深印象都係巴西名宿李華度嗰球世界波，「嗌晒出嚟」，形容睇到當年當打球星，完全值回票價。佢又話明星隊好識做，雙方都好有風度，球員踢得舒服，觀眾睇得舒服。
更多港聞
【Emily】新春金多寶獨中料過億 29號最旺
【明報專訊】今日隨時誕生歷來六合彩頭獎最高派彩得主！六合彩新春金多寶今晚9點半攪珠，將有8500萬元金多寶，若果10元一注中頭獎，估計派彩高... 詳情
【Emily】德總領館介紹卡通龍 象徵希望友誼環保
【明報專訊】今年係龍年，唔少人都討論東西方龍嘅唔同形態，德國駐港總領事館就喺facebook介紹喺德國家傳戶曉、受大人同細路歡迎嘅卡通龍塔巴... 詳情
【Emily】大埔情人節夜市 設「放閃」打卡位
【明報專訊】特首李家超早前宣布「日夜都繽紛」，各區民政事務處都牽頭大搞夜市等活動。今日係情人節，大埔藝術中心噚日提早開始搞「心願夜市」，放有... 詳情相關新聞
