【Emily】美斯缺陣 有份嗌回水 曾俊華提兩觀點
[2024.02.12] 發表
【明報專訊】球王美斯訪港不上陣，演變成「回水」風波甚至國際關注，2月4日有入大球場觀賽嘅前財政司長曾俊華喺一周後出帖評論事件，話佢同在場絕大部分美斯擁躉一樣覺得非常失望，並講咗兩個值得思考嘅觀點，第一，本來係大家支持嘅盛事，最後喺噓聲下收場，仲要演變成國際事件，「好事變壞事，點解好似近年屢見不鮮呢？」第二，佢話如果郁吓就將事件提升至政治層面，「咁就無可避免，一定會影響到香港喺國際間嘅名聲啦」。
曾俊華話，當日佢同老友、前特首曾蔭權夫婦一齊捧場，話曾蔭權都好鍾意睇波，當日佢都睇得好投入。曾俊華又話發現周圍好多講普通話嘅人，相信佢哋好多都係特別從內地來港，想一睹美斯風采。美斯無落場，全程仲一言不發，大家都好谷氣，佢話到完場前10分鐘美斯仲係著住件外套同佢哋一齊睇波，現場大家都大叫「回水！」，曾俊華都有叫埋一份。
曾俊華話，主辦方決定退番一半票價畀大家，至少會令失望嘅球迷冇咁谷氣，但佢話冇得睇美斯落場獻技，呢個遺憾就無法彌補。佢臨尾落TAG寄語「
好事可唔可以唔好變壞事」。
更多港聞
【Emily】情人節夜市消費滿$99可大屏幕放閃
【明報專訊】今年農曆新年假期後緊接情人節，大埔藝術中心響應「日夜都繽紛」，喺情人節期間搞浪漫夜市，話夜市期間只要喺場內消費滿99元，就可以透... 詳情
相關新聞
