【Emily】城大項目獲國家科研獎 孫東有份領導
[2023.07.25] 發表
【明報專訊】城市大學噚日公布，兩個研究項目獲得國家教育部2022年度高等學校科學研究優秀成果獎(科學技術)自然科學獎二等獎，其中一個係由創科局長孫東所領導。身兼城大生物醫學工程學系講座教授嘅孫東，一直專研機械人自動化操作生物細胞領域。今次獲獎嘅研究項目名為「基於磁控微機器人技術的細胞精準遞送理論與方法」。
研磁控微機械人精準遞送細胞
城大話，早喺10年前，孫東嘅團隊就開始探討如何應用磁力控制技術，配合微型機械人喺生物體內精確地運載細胞去指定位置。而項目圍繞三大方面，包括微型機械人嘅細胞運送研究、微型機械人磁力控制驅動系統，以及多部機械人嘅協同控制。今次團隊實現全球首次利用微型機械人喺體內精準運送細胞，亦係首度獲國際驗證相關技術可用於動物體內治病，為精準微創醫療奠定重要科學基礎。
團隊其他成員都係孫東指導嘅城大博士畢業生，分別係中國海洋大學副教授李俊漾、蘇州科技大學副教授牛福洲、中國科學院深圳先進技術研究院王燦、廈門理工學院馬瑋城，以及天合光能股份有限公司陳劍。
更多港聞
【Emily】換心芷希快1歲 盧寵茂探望話欣慰
【明報專訊】BB女芷希上年12月接受內地心臟移植，轉眼間就快1歲生日。醫衛局喺facebook分享，局長盧寵茂噚日帶埋心意卡同小布書去兒童醫... 詳情
【Emily】炎夏開工 體育園地盤工友獲派雪糕降溫
【明報專訊】前日「大暑」後，噚日天氣持續炎熱，正午時分全港大部分地區氣溫都有33℃或以上。工聯會黃國、郭偉强、梁子穎、葉偉明齊齊到興建緊嘅啟... 詳情相關新聞
