【Emily】慢必曾訪爆疫食肆 檢測呈陰性
[2020.12.02] 發表
【明報專訊】政府早前公布，曾到訪3間爆疫食肆嘅食客要強制檢測，包括上環泉章居大飯店，原來人民力量陳志全(慢必)都係座上客。慢必噚日喺fb透露，上星期六晚同朋友喺中山紀念公園體育館打排球，之後去泉章居食咗個「快飯」，後來朋友通知佢，政府要求食客檢測。
慢必話雖然強制檢測者可以去社區檢測中心，但港島區得一間，網上預約仲要今個星期四先有位；想去普通科門診攞樽留深喉唾液，但又要一早排隊、每間診所有配額，亦唔知幾多日先知結果。最終，佢噚日決定去衛生署認可嘅私營化驗所檢測，事前要睇醫生寫轉介信，朝早11點到化驗所留樣本，仲要記住起身唔好刷牙、飲水。慢必喺當日下晝6點前收到通知，結果係陰性；其後仲要將檢測結果話畀衛生署聽。
稱申報靠誠實 檢測靠自律
今次強制檢測經歷，慢必認為成個過程都係靠誠實申報，如果食客冇用「安心出行」，衛生署追查唔到邊個去過相關食肆；此外，「深喉唾液」檢測者係咪求其吐口水都冇人知道，只能靠自律。慢必呼籲，疫情高峰期，大家盡可能都留喺屋企食飯啦。
更多港聞
【明報專訊】立法會主席梁君彥噚日決定，因應近日疫情愈嚟愈嚴峻，今日縮短開會時間，唔會處理兩項唔具立法效力嘅議員議案，有建議派料今日下晝約2點...
詳情
【明報專訊】香港律師會每年都會舉辦「青Teen講場」，希望透過唔同活動同講座培養學生對學習法律知識嘅興趣。Emily發現今年有個新活動，叫2...
詳情
【Emily】沙嶺直播「公祭」 區議員搞「公投」
【明報專訊】沙嶺公墓安葬無人認領嘅遺體，自去年反修例運動以來，有唔少未經證實嘅流言，有區議員就每月都走去沙嶺拜祭，油尖旺區議員陳梓維就每月都... 詳情
相關新聞
