【明報專訊】噚日下晝政府舉行例行疫情記者會,好耐無見嘅食物及衛生局副局長徐德義現身,但講開場白總結本港疫情時,將本港截至前日(5日)嘅確診數字,講錯為150宗,講大咗足足45宗。
確診講大45宗 新聞官遞紙方知錯
徐醫生似乎無意識到自己講錯,仲重複咗幾次,過咗幾分鐘,現場嘅新聞官遞咗張紙畀佢,可能係提醒佢正確嘅確診數字,徐醫生語塞咗幾秒,再更正番正確數字應該係105宗。
記者問違檢疫令數字 答無資料
政府2月8日實施強制檢疫,但公布嘅資料好少,例如家居檢疫者所住大廈都係最近先公布,而唔少市民關注有幾多家居檢疫者曾離開住所,政府就更少提及。噚日趁副局長在場,有記者就問佢突擊檢查次數同違反檢疫令數字,徐醫生只係話絕大部分人無離開家居範圍;至於具體數字,佢話手頭無資料。究竟要幾高級嘅官先掌握具體資料,Emily都唔知要問邊個。