【明報專訊】中科工程董事潘焯鴻近日因為投資土耳其口罩工廠，仲打算將部分口罩派畀有需要嘅港人，頻頻曝光。近日政界亦流傳佢有意參加9月立法會選舉，佢日前接受Emily查詢時，承認「積極考慮」出戰九龍西，話對政府好不滿，亦認為立法會應該有一個有獨特見解嘅議員。佢形容自己同政府、港鐵可以鬥咗咁耐，「戰鬥力強」，又自言「思維好黃」，自己係民主派。 潘焯鴻同Emily講，有朋友游說佢參選，認為佢勇敢、睇事好精準，「有人叫我去選工程界」。但佢話無意參加功能組別選舉，但會支持年輕人參選工程界。佢話雖然自己攻擊政府，但仍有「藍絲」接受到佢，仲引述自由黨榮譽主席田北俊話，「我唔係太黃，藍嘅人都鍾意我」。 佢強調自己係民主派，「我思維好黃」，但話仲未有最終決定，除咗要考慮「社會需唔需要我」，仲要過家人一關，話太太唔太想佢參選。佢又話要同泛民傾，唔想分薄泛民選票，強調一旦參選，係想「藍營選唔到」。
|
| |
| |
