【明報專訊】反修例風暴以來，唔少人擔心「天眼」、人臉辨識技術等會侵犯私穩。話說機場舊年啟用自助閘口，旅客經人臉辨識機核實身分，只需20秒就可以入禁區，同時都有保留人手檢查。新民主同盟荃灣區議員譚凱邦(Roy)噚日同Emily投訴，話搵唔到「沒有人面識別」標示通道，唯有問保安人員，對方要求佢向職員表明「唔用人面識別」，咁職員就會用人手(即肉眼)同佢核對登機證。 主動向職員表明唔用即可 Roy話覺得安排好奇怪，唔明點解要乘客主動開口問，仲建議大家去旅行入禁區時避用，「記得選有職員的通道，並指明用人肉安檢，不要人面識別」。 Emily睇番機管局網站，上面有列明關於「自助保安閘口」嘅「個人資料收集聲明」，提及當局會將收集到嘅旅客個人資料加密，僅會保留匿名資料作統計分析用途。旅客乘搭航班離港7日後，系統就會刪除資料。但聲明又話「為保障機場使用者及航空保安目的、獲授權人士或監管當局就民航運作而提出要求者則作別論」。 機管局回覆，如旅客唔想用自助保安閘口，可以去輔助通道及將有關意願話畀職員知。
|
| |
| |
