【明報專訊】政府新聞處最近推出多條1分鐘短片《睇真D 知多D》，似乎想借社交網站澄清傳言，不過惹來網民「派嬲」，其中噚日喺facebook上載嘅新片，主要係解釋聽日區選選票嘅設計係會有切角，方便視障選民，否認網上謠傳話票站職員會破壞有切角嘅選票。 網民反應半數畀嬲 其實呢個系列嘅短片已經出到第三集，上一集係講催淚煙對健康嘅影響，話啲催淚煙粒子唔會擴散得太遠，仲教市民可以著番套防護裝備去清潔；而第一集就提到有傳言話市面售賣嘅食物可能受催淚煙污染，主持人就叫大家自行上食安中心個網睇點處理。 Emily留意到網民似乎唔太受落，短片嘅reaction入面過半數都係「嬲嬲」，唔少留言都質疑政府「講大話」，例如講解催淚煙嗰條短片，有人就留言「如果係健康怕乜公開成分呢？」 4條短片係由幾個政助等人「擔綱主演」，除咗曾任職TVB嘅特首辦特別助理李惠，其餘仲有教育局政助施俊輝、勞福局政助馮興禮同商經局政助馮海容，唔知市民認唔認得佢哋呢？
|
| |
| |
;){kind=small}
