【明報專訊】多名警員噚日凌晨時分有晒盾牌，去到大埔墟車站外嘅「連儂隧道」，撕走貼喺牆上、印有警員個人資料嘅紙。警方全副武裝撕Memo紙嘅做法引起市民質疑，唔少人乘機改圖抽水。

電影《獅子王》即將上畫，有網民就將電影海報改成《撕紙王》，本身嘅獅子動畫改成一批持盾警員，連電影英文名The Lion King都變咗「The 拉人 King」。亦有網民將電影Finding Nemo(《海底奇兵》)改成「Finding Memo」，諷刺警方行動。

吉野家：「獅子狗」真名「竹輪」

有網民就張貼「獅子狗」圖像，用諧音諷刺警員係「撕紙狗」；連鎖餐廳吉野家都抽水，出post寫「唔准叫我獅子狗」，並喺帖文寫「想食獅子狗，唔只大埔有」，又強調「獅子狗」呢種食物其實叫「竹輪」。有網民留言「抽到咁！唯有去幫襯」；吉野家就回覆「近排興隻『抽』字嘛」，連有警員叫市民「隻揪」嘅諧音都玩埋。