【明報專訊】Emily前晚喺觀塘和樂邨嘅公眾地方，見到有人貼出反對《逃犯條例》修訂嘅海報，宣稱如果修訂通過咗，外資會撤走，仲話多國正考慮取消對香港嘅免簽證，「旅行濕滯」。行會成員、民建聯立法會議員張國鈞批評，海報上訛稱修例會令外國取消對香港免簽證係講得太過離譜，反對嘅人唔應該無所不用其極，呃人6月9日上街，否則到時多人都無用，冇公信力。民陣召集人岑子杰就呼籲，反對《逃犯條例》修訂嘅戰友要基於事實去解說反對原因。 張國鈞批評講得太過離譜 貼喺和樂邨嘅海報都幾精美，冇講明係乜嘢團體印製，但內容就好多誤導，又「或」又「可能」，例如話「歐盟多國或取消免簽證」、「日本可能取消免簽證」、「外資亞太區總部逃亡潮」等等。 張國鈞就話，一個國家會唔會喺另一個地方投資，其實都係從自身經濟利益出發，香港同歐美嘅經濟係互利，佢就唔覺得外商會因為修例通過而唔嚟香港投資。 民陣召集人岑子杰話，呢啲單張同民陣無關，佢呼籲反對《逃犯條例》修訂嘅戰友要基於事實去講點解要反對，唔好學保安局長李家超同特首林鄭月娥咁，為達政治目的而滿口謊言。喺呢幾張海報中，提到多國會考慮取消對港免簽證，岑子杰亦話完全無聽過有咁嘅事。
|
| |
| |
;){kind=small}
