【明報專訊】監警會負責監察警方處理市民投訴，但並無調查權力，常被指如無牙老虎。主席梁定邦噚日喺上任一周年同傳媒食飯講吓感受，主動提及呢個問題，話無調查權唔等於無牙老虎，仲笑笑口話畀Emily知，佢最近甩咗幾隻牙，都無時間補番。

講開呢個問題，梁定邦就忍唔住話當年。佢話1977年尾佢由廉政公署社區關係處調去做防貪部門助理處長，當時只有30歲。佢話廉署連防貪部門都有調查權，可以派傳票畀政府部門作調查，佢上手嗰位助理處長話佢知，有啲部門唔合作，尤其係警察，而嗰陣時正醞釀特赦警察。佢埋到枱，發現上手助理處長留低一張發畀警務處嘅傳票，佢諗諗吓，覺得一發傳票，以後要搵對方就要發傳票，唔值得，於是直接走去警務處搵處長傾。佢記得處長最初唔太理佢呢個「小薯」，但佢動之以情，話大家都係想做一個更好嘅機制，講講吓對方覺得大家目標接近，就改為稱呼佢個名Tony而非其姓氏，仲搵咗個副處長嚟，話畀佢知以後Tony嚟就乜都畀佢咁話。

梁定邦同Emily講，佢認為監警會嘅影響力比權力更重要，監警會同警方有強烈默契，又話警方對於監警會嘅意見，大部分都接納。