【明報專訊】放假唔知去邊度？有無興趣去西九文化區M+博物館睇展覽呢。M+將於6月7日至10月20日舉行「境遇——五個人」展覽，展出多名國際女性藝術家，包括香港嘅馮美華、韓國籍李昢、美籍Ana Mendieta、德國籍Charlotte Posenenske嘅重要作品，又特意委託西班牙籍嘅Lara Almarcegui創作新作。展覽作品包括雕塑、裝置同流動影像等，橫跨1960年代至今。

免費入場 展品歷史橫跨60年

今次展覽主題叫「境遇」，其實係一批藝術家探索「境」嘅概念，並提出各自見解。聽落似乎好抽象，其實作品都係源於藝術家與地方、環境嘅對話，由不同歷史時刻同角度出發，促使觀眾探索自己身處之地。展覽免費入場，開放時間係逢周三至周日，以及公眾假期，相關活動仲包括與參展藝術家對談等。