【明報專訊】佔中案被告之一嘅公民黨立法會議員陳淑莊(Tanya)前日做完移除腦膜瘤嘅手術，聽講經過化驗後證實係良性腫瘤。下月10日案件就要判刑，相信Tanya暫時可以鬆一口氣，先好好休養。至於被判囚8個月嘅社福界立法會議員邵家臻(阿臻)就仍然喺監獄病房，暫時無得工作同放風，只好靠睇書寫文度日。

上星期五先做完「通波仔」手術嘅阿臻，周一轉咗去赤柱監獄繼續服刑。阿臻嘅議辦職員噚日去咗探監，話阿臻好精神，但明顯瘦咗，仍喺監獄病房，好彩呢幾日比較涼爽，瞓得還好。

在囚者平日要喺獄中工作，每日可以放風一個鐘，阿臻暫時不能放風同唔使做嘢，佢𠵱家主要靠睇報紙同睇書、寫信同寫文章打發時間，同喺病房望吓窗，做吓簡單嘅甩手操，本身係基督徒嘅佢仲報名參加獄中團契。阿臻暫時只係收到好少信，好期待有更多人寫信畀佢。

阿臻之前向懲教署申請外出出席立法會大會被拒，身在獄中嘅佢好關注修訂《逃犯條例》嘅情况，不忘呼籲市民參加周五晚同周六早上嘅集會。至於會唔會申請保釋等候上訴，佢暫時未有決定，要再問律師同屋企人意見。