【明報專訊】1997年2月22日創刊嘅本地漫畫雜誌《CO-CO!》，對於80、90後一代而言都係童年回憶，但隨住時光飛逝，都迎來停刊嘅一日。消息一出，唔少網民都分享當年回憶，紛紛慨嘆可惜。原來政界都有唔少《CO-CO!》迷，香港眾志羅冠聰形容《CO-CO!》係美麗嘅兒時回憶，諗番當年儲數碼暴龍卡、遊戲王卡，乜都玩一餐；社區前進林兆彬仲出post，影咗自己屋企儲起咗嘅幾十本《CO-CO!》，話一直唔捨得掉。

喜愛日本文化嘅立法會議員區諾軒同Emily講，佢由創刊開始就睇《CO-CO!》，憶述《CO-CO!》係佢接觸本地漫畫嘅開端，亦帶動好多小朋友之間嘅流行文化，包括四驅車、搖搖、高達等，《數碼暴龍》流行時，直情人人手持一部數碼暴龍機。《CO-CO!》停刊，區諾軒慨嘆係一個時代嘅終結，𠵱家唔少人都轉為上網睇漫畫，但佢認為只有以前嘅傳播方式，先能夠引起流行文化，例如現時已經見唔到小朋友周街玩搖搖、射彈珠啦。