【明報專訊】新民黨噚日舉行新春傳媒茶敘，主席葉劉淑儀同一眾領導層帶埋10幾個區議員同社區主任出席。政界盛傳葉太今年會出戰區議會，以備明年轉戰立法會「超級區議會」議席，葉太噚日強調仍在考慮階段，不過坦言擔心出戰區選會「陰溝裏翻船」，因為參選會引嚟對手重點「招呼」，「到時好多人走出嚟(參選)揼我」，強調做區要好勤力，不能掉以輕心。

過去政界名人出選區會，都會引嚟對手以「打老虎」姿態挑戰。葉太話唔敢太早講自己會選邊區，因為會「好多人跟住我、打我」，講到呢度佢更話「死喇，我好驚」，最終選邊區要視乎邊區接受佢多啲，但承認遲落區亦有顧慮，因為區選重視地區工作，區選唔同立法會選舉，輸一票都係輸。

今日係情人節，葉太噚日同黨友向記者派花，祝大家蜜運成功，黨副主席黎棟國就叫男士們唔好錫住荷包，要買花買朱古力𧨾另一半開心。沙田鄉委會日前喺車公廟為沙田求得下籤，身兼新民黨黨員嘅沙田區議會主席何厚祥就話求籤如人生，有順有逆，大家唔使咁擔心。