【明報專訊】新春佳節，自由黨黨魁鍾國斌(Felix)同行會成員、民主思路召集人湯家驊(Ronny)都喺facebook上載咗外遊嘅相，兩人都置身一片藍色之中。Felix去咗紅海浮潛，話自己睇過卡通片《埃及王子》，講摩西點分開紅海帶猶太人出埃及。佢喺fb話有機會去到埃及，梗係要落水游吓，又話「啲水好清好靚。不過就凍咗啲，上水個下都幾『甘』」。

Ronny就同一大班「波友」到摩洛哥，佢介紹呢次行程嘅第一站去咗15世紀古城舍夫沙萬，當地啲屋都油上藍色，係著名景點。Ronny形容呢個古城「藍藍得十分可愛」，令佢諗起突尼斯古城同希臘嘅聖托里尼(Santorini)。

湯家驊遊摩洛哥 陸頌雄執書

唔少議員就留港消費，工聯會陸頌雄就唔怕唔吉利，年初三赤口「去執書」，話趁元朗三聯書店結業大特價，以80元買咗幾本書。