【明報專訊】近日維港上空晴空萬里，約90隻帆船超過400名熱愛帆船嘅愛好者，喺剛過咗嘅星期日一齊出海，參加由香港遊艇會舉辦、已有逾百年歷史嘅春季帆船賽。回想當日近百隻船喺維港揚帆，場面壯觀，而其中一隻帆船上就出現大家好熟悉嘅影帝梁朝偉，戴住黑色cap帽嘅偉仔唔係拍戲，而係同其他參賽者較勁，偉仔隻船DAVINLOONG仲喺參賽組別中攞到亞軍，相當威水。

年幾前一試鍾情：可陪到老運動

聽大會講，偉仔一直喜歡海同大自然，自小已經好想學船，尤其偏好唔用機器驅動嘅帆船，喜歡船與大自然間嘅互動，面對寧靜大海更有助減壓。佢年幾前先正式學帆船，仲 「一試鍾情」，星期日係佢首次出維港參賽，偉仔話感覺刺激，因為船多水流急，同喺西貢等水域作賽嘅感覺完全唔同。

為咗汲取更多經驗，偉仔一直都有意到海外參賽，舊年更參加瑞士一個帆船賽，交晒報名費同請咗海外水手，但最後因接拍咗電影《風再起時》要苦練鋼琴，放棄賽事。今年佢再接再厲，月底會到匈牙利參加一個歐洲帆船賽，希望可以從經驗豐富嘅專業船員身上偷師。

偉仔呼籲喜歡運動同大自然嘅年輕人多接觸帆船運動，試吓適唔適合自己，或者好似佢咁「一試鍾情」。佢仲話帆船運動啱唔同年紀嘅人，係可以「陪伴到老」嘅運動。