【明報專訊】新民黨立法會議員容海恩(Eunice)喺2016年立法會選舉嗰陣，有人為佢冠以「法律界桂綸鎂」之稱，同台灣藝人桂綸鎂一樣都係氣質美女。平時喺立法會或者公開活動見到佢，都係一身行政裝束，佢前晚(29日)就換上晚裝長裙出席亞洲電視數碼媒體嘅開台禮，仲上台唱歌，令人眼前一亮。

有網民讚唱得好聽

佢之後喺facebook上載咗當晚表演嘅片段，片段開首佢先獨唱《終身美麗》，之後就同「AO歌王」、現為廠商會行政總裁嘅楊立門等人一齊唱《一見你就笑》。Eunice雖然唔係專業歌手，但都有番咁上下台風，完全冇怯場。唔少網民都喺佢fb留言，讚佢唱得好好聽，仲讚佢好靚，連同佢友好嘅輔仁媒體主編容樂其都有畀「心心」。

其實今次唔係Eunice第一次踩台板唱歌，佢之前都有喺活動即興上台唱番幾首。

Eunice喺fb預告，逢周二晚佢都會喺亞視主持直播節目《今晚見》，每集會邀請唔同政商界朋友上來傾偈，噚晚第一集就請咗立法會議員謝偉俊上節目做嘉賓。今次亞視復播唔係用大氣電波，而係透過手機應用程式或OTT平台，想睇嘅讀者就要下載個App或者買個亞視機頂盒喇！