【明報專訊】有意出選港島區立法會補選嘅新民黨南區區議員陳家珮，之前就畀眼利嘅街坊發現，佢派發嘅2018年年曆上多咗一日，有「12月32日」，而立法會議員、新民黨主席葉劉淑儀印喺年曆上嘅頭銜，仲變埋「立法會區議員」！陳家珮前晚喺facebook上載咗條影片，訪問咗啲街坊同葉太點樣善用多咗嘅「12月32日」，抽番自己水。 頭銜變「立法會區議員」 好多街坊就話，如果真係多咗一日會好好休息、同家人朋友聚會，而葉太就話「其實呢個日曆係一個預言」，預祝打工仔爭取多啲假期，「工聯會都想咗好耐，想白領有17日勞工假，我們就先加一日」。葉太仲話，個年曆係預祝埋自己當選區議員，「即係話我2019年去選區議員有希望喇，好好意頭，要喺屋企儲多幾份，做紀念」。早排曾經傳出葉太有意參加山頂區補選，葉太主動話預祝自己當選區議員，唔通佢已部署定，2019年去馬選區議會，為2020年參加立法會「超級區議會」議席鋪路？
|
| |
| |
;){kind=small}
