UGL文件有幾秘密？ 議員議助一早有copy
[2017.05.20] 發表
【明報專訊】立法會UGL專責委員會爭議仲未有平息迹象，事件之所以被揭發，係因為有立法會職員發現周浩鼎提交嘅修訂文件電子版，電腦紀錄顯示「CEO-CE」(特首辦特首英文縮寫)曾經修改過文件。呢件事喺委員會閉門討論，講到好似係秘密唔能夠外泄咁，但原來呢份文件嘅電子版，喺4月26號發送畀所有立法會議員，所有議員、議員助理甚至記者都有機會睇到，只係當時無人發覺。
一般而言，立法會議員平日都係睇文件紙張版本，就算睇電腦版文件，正常都好少會用「追蹤修訂」功能去睇修訂來源。所以即使大家都曾經收過秘書處發送周浩鼎提交嘅文件，都無人知道文件「有啲嘢」。不過，立法會秘書處職員就好細心，留意到阿鼎提交嘅文件「背後真相」，先揭發阿鼎將梁振英畀佢嘅文件，按個掣傳畀秘書處。
經過呢一次之後，第日立法會議員收到文件，可能就要做多重功夫，用「追蹤修訂」功能睇下文件有無問題。當然，如果大家唔想畀人知修改過程，就要將文件由「doc檔」轉做「pdf檔」喇。
更多港聞
【明報專訊】經常發表網上評論、被網民封為「燈神」嘅網上媒體「謎米香港」創辦人之一蕭若元，前日喺自己嘅網台節目《最新蕭析》宣布，7月22日起唔...
詳情
相關新聞
