《最新蕭析》7月尾開始不談時政
[2017.05.20] 發表
【明報專訊】經常發表網上評論、被網民封為「燈神」嘅網上媒體「謎米香港」創辦人之一蕭若元，前日喺自己嘅網台節目《最新蕭析》宣布，7月22日起唔再評論香港同內地嘅時事財經事務，仲講明係「我個仔蕭定一嘅要求」。個節目就改名做「退休蕭析」，改為講旅遊、「八卦」哲學、人生、外國時事同歷史內容。
蕭先生噚日同Emily解釋，係因為以前講過68歲就要退休唔講政事，佢本來諗住循序漸進咁講少啲，但蕭公子就同佢講要即刻停，Emily好奇點解佢「選擇性退休」唔講政治但講其他題目，問佢係咪有政治壓力，佢就話：「我無嘢可以講，有咩問蕭定一啦。」之後就收咗線。
Emily嘗試聯絡蕭定一，但電話一直無人聽。翻查資料，舊年有報道曾經話蕭氏父子係「本土民主前線」嘅「幕後金主」，蕭定一發表過聲明，話自己「作為一個在香港及中國地區經營文化產業的生意人，對參與香港任何政治活動絕無興趣」，又話自己係「一個簡單的愛國商人，請不要再將政治與我拉上任何關係」。
更多港聞
相關新聞
