本報昨報道中澳法學交流基金會「一帶一路」訪京團團員「夜蒲」事件後，港區全國人大代表譚惠珠即辭去基金會榮譽顧問一職，特首梁振英昨出席行政會議前被記者問及事件，他無正面回應夜蒲事件會否影響「一帶一路」形象，但指一帶一路是國家一個重要倡議，「我們每一個人，無論在香港、或者任何一個地方，都要關注個人的行為」。 工聯會立法會議員黃國健則認為事件不會影響一帶一路國策，但涉事個人要負責，「兩件事無乜關係，但係要個人負責囉，就算外界對佢(馬恩國)有不滿，話佢態度問題，又或者對佢表達嘅事唔滿意，你都好難叫佢為今次件事負責任，『大人大姐』點管？」 民主黨立法會議員涂謹申指有關活動涉及官方色彩，需注意行為，「你係去地方有目的咁交流，如果有啲行為係失禮，又同行程訪問目的唔一致，都要注意，你唔能夠話純粹係私人時間(解釋)就得」。 被問及基金會主席馬恩國需否負責，涂稱個別組織有不同規則，事件有可能影響組織觀感，「咁要睇佢有幾緊張個組織，每個組織都有佢自由點處理」。 公民黨立法會議員楊岳橋指事件令一帶一路形象更差，「政治上嚟講一帶一路已喺港人心目中打咗好大折扣，加埋一個打正旗號嘅訪京團，爆出呢啲新聞，會令人戴有色眼鏡去睇呢啲人係咪有心宣傳」。
|
| |
| |
