【明報專訊】噚日有大約20個駐港領事同港澳特區名譽領事團成員，去咗立法會同議員午宴。Emily聽聞席間有領事向議員查問港獨問題，因為唔太理解點解會有人搞港獨，亦有領事提到近日引起滿城風雨嘅梁振英女兒行李事件，有人覺得「第一家庭」有特權一啲都唔奇。

有參加午宴嘅民主黨黃碧雲話，有同領事講吓香港近况，碧雲話有領事認為搞港獨並非理性選擇，因為覺得香港嘅成功，同背靠中國有關。碧雲就向領事解釋，青年有港獨思潮係同中央近年對港政策有關，認為如果中央可以好似回歸初期咁，唔干涉本港內部事務，香港人係唔會有港獨思潮。碧雲亦強調唔覺得大多數人認為香港要獨立。

大家熟悉嘅英國駐香港總領事吳若蘭，以及美國駐香港總領事夏千福都無現身。民主黨單仲偕就同英國領事館代表一齊坐，單仲偕話對方只係問佢點睇9月嘅立法會選舉。