馮煒光share「精神病人起義」文章被投訴
[2016.04.04] 發表
【明報專訊】年薪加約滿酬金達383萬、即係日薪逾1萬元嘅新聞統籌專員馮煒光向來惹火，不時被前黨友、即係民主黨成員狙擊，佢近日喺facebook轉載專欄作家屈穎妍一篇題為〈一場精神病人的起義〉嘅文章，就被人批評佢為精神病患者引來負面標籤效應，令未有治療嘅病人諱疾忌醫，民主黨區議員袁海文仲去信平機會投訴。馮煒光就話唔評論被投訴。
區議員函平機會 稱恐標籤病人
屈穎妍篇文談及近日「香港民族黨」成立，但除咗主席就無見到其他人，「原來，又是一班躲在鍵盤後的窩囊，叫叫喊喊又把香港搞得滿城風雨」，又引述估算話香港平均每7人就有一人患精神病，病人妄語怪行不能自控，問題係旁人反應同演繹，「絕對影響病患者的病情進展，繼而影響社會大眾的整體安危」。
民主黨袁海文認為，馮煒光應尊重新聞統籌專員嘅身分，要求佢收回分享有關文章同立即道歉。佢又去信平機會主席陳章明，認為可能各人對港獨、言論自由有唔同意見先會寫、分享有關文章，但用精神病人做比喻係嚴重歧視，批評馮煒光同屈穎妍喺政府擔任要職或身為知名人士，影響力大，亦更容易把精神病作負面標籤或污名化，只會令精神病康復者加添不少障礙和負擔，要求平機會調查有無違反殘疾歧視條例。
更多港聞
相關新聞
