【明報專訊】銅鑼灣書店負責人失蹤事件全城關注。參加立法會新界東補選嘅公民黨楊岳橋(Alvin)主動挑機，針對勁敵民建聯周浩鼎(Holden)，話由噚日起喺facebook上載短片質詢Holden，仲大玩食字，叫「鼎，你答我」。Alvin出嘅第一道題，就係叫Holden解答書店負責人李波「被失蹤」事件。Holden都不甘示弱，回應有別於傳統建制派，仲話睇到噚日嘅《環球時報》社評內容時，佢都覺得「好嚇人」！ 新東補選網上開戰 立法會新東補選開始，參選人除咗「落地」擺街站宣傳，仲大打網絡選戰。Alvin話，Holden無去日前電台辦嘅論壇，所以利用fb，拍片「有嘢問鼎」。Alvin話「被失蹤」事件咁大件事，但民建聯議員葉國謙就喺立法會反對緊急討論，於是問Holden同唔同意呢件係嚴肅嘅事件需要討論。 Alvin網上問，Holden亦雲上答，喺fb話，「李波事件，警方仍在調查，未有結果，不宜作揣測或評論。但如果真有內地公安在香港執法，這是破壞一國兩制，這是絕對不能接受」。 Holden又向Emily補充，話噚日見到內地《環球時報》社評講呢件事，提到「強力部門」可以「規避法律」，作為法律界嘅佢都覺得「好嚇人」，話呢篇社評「令人擔憂」，所以《環時》應該澄清一下。 除咗以上兩黨有人報名參選，西貢區議員方國珊亦表明會參選，唔知佢落埋場打網絡戰會唔會更熱鬧？
|
| |
| |
;){kind=small}
