不足10人報名 港青北上義教冷淡
[2015.12.15] 發表
【明報專訊】高官及政商領袖成日叫後生仔返內地實習、認識國情，但民政事務局近年搞嘅「香港青年服務團」，招募青年到內地貧困地區義教嘅計劃，今年反應冷清，去年仲有近30人參加，今年不足10人報名，搞到民政局噚日都要公布，將申請截止日期由今日延長至明年1月5日。
截止日延長至1月5日
民政局2011年開始招募青年去廣東省韶關市或梅州市，到較落後嘅地區為小學及初中學生提供支援教學服務，教英語、體育、音樂、美術同電腦等科目，至今已有超過100人參加。
活動至今已第6期，報名人數就急跌，只有近10人，其中部分人講明只任教上學期，所以民政局想搵後生仔喺2016年2月至7月嘅下學期任教。至於點解後生仔熱情冷卻，究竟係因為年輕人𠵱家抗拒返內地，還是有其他更吸引嘅活動選擇，例如去外國工作假期，咁就不得而知。
參加計劃者每月有3200元人民幣生活津貼及來回交通費資助，完成計劃並表現良好，仲有證書同獎勵金5000港元。有興趣者可瀏覽www.servicecorps.hk了解詳情。
更多港聞
操場墜石屎 小學重置無期 毗鄰建插針公屋 擴校申請失敗
【明報專訊】現時本港有28間於60年代至80年代期間隨公屋興建的「火柴盒式校舍」，因殘舊及細小等不合標準。柴灣基督教香港信義會信愛學校校舍有... 詳情
【明報專訊】專家在香港發現170年前的維多利亞時代界石！香港大學建築學院房地產及建設系的導師與學生在今個學期一次實地考察中，於港島東區西灣山...
詳情
相關新聞
