司局長齊講運動 軟銷青年

司局長齊講運動軟銷青年

[2015.01.05] 發表

【明報專訊】第二階段政改諮詢最快今個星期展開，兩個局長同一個司長噚日繼續做「鍵盤戰士」，不約而同以運動做比喻，寫網誌向市民特別係青少年大打「溫情牌」。

財爺曾俊華喺網誌上感觸咁話自己之前做開球禮嘉賓，好懷念少年時代喺美國窮苦嘅棒球歲月。佢話對比?家年輕人棒球裝備齊全，「和我當年喺馬路邊用掃把棍打球，還要將一個波切開兩次玩」，不可同日而語，又話去比較「誰更幸福」呢個問題唔會有答案，只係期望年輕人好好打下去，唔好半途而廢。

民政事務局長曾德成就喺網上專欄話本港將會組團參加今年10月嘅第一屆全國青年運動會，大讚年輕運動員對體壇貢獻，「開拓了光明嘅前路」，唔知係咪想挽回佔領運動政府冇咗嘅年輕人支持度呢？勞工及福利局長張建宗嘅網誌同樣講運動——用足球賽比喻今屆政府剛完成一半任期，「賽完上半場」；又自誇勞福局一開波就按梁振英嘅施政方針，喺各範疇上全力以赴，今年邁向球賽嘅下半場會繼續推出惠民措施，借機同議員講希望佢哋唔好再「拉布」，等市民可以快啲受惠。

發展局長陳茂波就無湊熱鬧講運動，但喺網誌度都係講年輕人，佢用「獅子山下」為題，提到不少年輕人參與佔領運動過程中，家人同朋友之間或因為政見不同而關係緊張，希望大家唔好忘記舊有「同舟共濟、拋棄區分、共對困難、攜手踏平崎嶇」嘅獅子山精神，一同放開彼此心中矛盾實現理想咁話喎。