【明報專訊】唔少人都知特首梁振英(CY)同自由黨關係麻麻，特首選舉期間，自由黨寧願投白票都唔支持梁振英；自由黨田北俊並多次批評梁振英，叫對方考慮辭職呀咁，不過話晒自由黨都有5票，梁振英同民主派已經無偈傾，Emily知道佢約咗自由黨遲少少食飯交流吓，田大少都有份去。

自由黨方剛透露，梁振英約該黨食飯，佢哋當然幾個一齊去啦，佢話其實梁振英上任之後，都有約吓佢哋食飯嘅，不過佢就唔記得，呢餐飯究竟係田大少被撤銷全國政協委員職位之前定之後約喇。

方剛接任黨魁呼聲高

田北俊早前辭任自由黨黨魁一職，該黨會喺下星期一(12月1號)改選，相信好大機會由方剛接任。方剛同Emily講，自由黨無論如何都要用兩條腿走路，即係選舉一定要面向直選，又話黨定位唔應該只為利益同選票，而係要講真話，又話該黨部分青年唔錯。睇嚟方剛接任黨魁唔會hea做，有意帶領自由黨做好工作，喺未來選舉派人出戰直選。