【明報專訊】潮流興講保育，醫管局最新一期《協力》刊物就回味「那些年」，將各大醫院嘅悠久建築如數家珍，其中於1925年啟用、有89年歷史嘅九龍醫院擁有10座獲評級嘅歷史建築物，A、B、C、P、R座同已改建辦公室嘅M座，都被列為二級歷史建築。

九龍醫院係九龍區首間公立醫院，混合中西典雅建築同低密度院舍設計，院內有唔少長走廊陽台同灰磚石柱等，配合四周翠綠環境，係休養嘅好地方。連講懷舊嘅港產電影《歲月神偷》，都喺M座嘅圓拱灰磚石柱走廊取景。

廣華夏秋祭神農祈福

至於廣華醫院就有著名嘅東華三院文物館，館內有樑架、吉祥圖案等傳統特色，亦有小圓窗、弓形拱窗等西方設計。廣華醫院神經外科部門運作經理黎偉城分享咗一個「秘密」﹕館內設有嘗百草嘅神農氏神位，所以同事每逢夏天同秋天，都會由院長帶領高層同事拜祭神農氏同切燒豬，幫醫護同病患祈福。佢仲話，文物館好似醫院嘅祠堂，可以凝聚廣華情。