【明報專訊】食物及衛生局長高永文噚日忙個不停，Emily大清早見佢出席一個慈善踩單車籌款，戴頭盔全副武裝，踩10公里賽程。局長喺比賽開始時，就要人幫手喺後面推上斜路，而且全程有單車好手傍住佢踩，結果局長用咗約40分鐘踩完全程。

「好彩無抽筋」 周日忙不停

完成比賽後，Emily見單車頭盔都未除嘅高永文有啲面青青、索晒氣，佢話早前原本唔諗住落場踩，但運輸及房屋局副局長邱誠武話「唔使驚，一齊行一齊推」，鼓勵佢參賽，所以答應踩車，點知其後先發現同日撞正參加咗「饑饉三十」活動。換言之，全日得粥水落肚嘅高局長話噚日血糖偏低，踩起嚟特別辛苦，大呼好彩雙腳未抽筋。佢仲話原來已經30幾年冇踩過「長程單車」，最近都係踩過一兩公里平路，所以今次都係自己踩咗七成路，其餘三成就頂唔順要推車上斜。

去到下晝，Emily見到高永文仲去咗馬場，喺馬會捐助醫管局買器材活動上，幫馬會主席施文信量血壓。周日大半天，局長又饑饉又踩單車又幫人量血壓，Emily不禁要寫個服字！