【明報專訊】聽日係除夕喇，睇番香港2013年嘅風風雨雨，有人用「三個字」形容——社會分裂﹕政界因政改各走極端各自表述；支持和反政府團體遍地開花，衝突不斷，「和理非非」(和平、理性、非暴力、非粗口)似蕩然無存。但另一方面，香港人繼續發揮絕處逢生精神，由「牛下車神」李慧詩，到打不死嘅王維基，都為大家注入陽光與生氣，而喺年中來港游水嘅萌爆大黃鴨，相信已成為新一代嘅集體回憶𠻹。

溫故知新，Emily嚴選過去一年矚目嘅人和事，同大家食住花生回味2013笑與淚。

★最紅組

要數2013年最紅，非特首梁振英(CY)莫屬，Emily用「慧科新聞」鍵入「梁振英」三個字搜尋香港媒體報道，發現有超過5.4萬篇提到佢個名，即係日均近140篇，直頭好似Twins首賀年歌《你最紅》歌詞咁「紅透天與地，世界轉動圍住你」。不過提到梁班子，今年都有唔少人請辭，惟當11月有第五個問責官員請辭時，CY就話「問責團隊人數歷來最多、最齊，大家都好願意加入我們新一屆政府，為社會做事」。2014係點？大家拭目以待。

CY紅，連帶民建聯立法會議員蔣麗芸(Ann姐)都紅透互聯網，皆因Ann姐年頭就特首僭建事件喺立法會撐CY時，以一句「好多男人連結婚紀念日都會忘記！何况個花棚？」而爆紅。Ann姐同Emily講，來年會繼續堅守信念去發聲！各位巴打留意咯。

★開心組

社會有唔少負面情緒，但仍然有好多開心事嘅！重獲下顎嘅易小玲上周做完手術後心情大靚，食到生日蛋糕，仲唔使再戴口罩，自信地笑面迎人！提到陽光故事嘅代表，當然唔少得做咗大學生嘅曾芷君，佢克服視障、以唇讀字嘅堅毅，就鼓勵咗唔少香港人。仲有「牛下車神」李慧詩，今年絕對係佢豐收嘅一年，先喺世界盃爭先賽奪金，再喺世界場地單車錦標賽同全運會連取多個獎牌，真係數都數唔晒！

政界方面，講過會「實踐亡父遺志」加入政府服務嘅馮煒光，等咗咁耐終於做到政府新聞統籌專員，咁樣係咪證明離開民主黨反而有好路數呢？

要數今年最開心，Emily相信唔少人會選黃色巨鴨訪港，佢嘅翹翹大屁股帶咗唔少歡笑畀我哋，希望有一日可以再見到佢喺維港暢泳啦！

★火爆組

呢一年都算係火爆嘅一年，「粗口橫飛」、諧音處處。呢股風暴由小學老師林慧思喺旺角街頭颳起，佢認為警察執法不公而用英文粗口罵警，搞到梁振英都要求教育局提交報告。林慧思回顧過去一年，話會以平常心面對，仲話如果畀多次機會佢，佢唔會爆粗，但會繼續為公義發聲。展望2014，佢希望可平平靜靜返學校教書。

立法會內亦「不遑多讓」，年初大律師馬恩國喺立法會同長毛梁國雄舌戰，馬大狀最後語出驚人，以一句「You're not even a fxxking Chinese」回應，繞樑三日。

去到下半年，民建聯立法會議員鍾樹根彈出，繼「收皮」偉論後，佢喺電視上評論特首施政時話，「睇你從邊個角度去睇，話完全無問題又唔係嘅，肯X定係有問題，呢個世界，沒有最好」，但樹根呼冤，話自己只係講「肯肯定」，肯定無講粗口！

最後，梗係有狼公仔「路姆西」啦，路姆西由社民連成員向CY一掟成名，全城搶購；宜家家居將佢改名「路福西」，唔知2014年仲有冇人買番隻呢？

★失落組

政界嘅「失落人物」排名不分先後，其中包括喺年初大爆聲稱梁振英答應畀佢入行會嘅承諾無兌現，後來被廉署拘捕嘅前全國政協委員劉夢熊。夢熊大師每到法庭應訊就會拋金句表達感受，最近一次佢就話「立地頂天漢子心裏，磊落永不折腰」(《大丈夫》歌詞也)。

至於梁粉張震遠，則因為商交所「爆煲」而被入稟追數，消失於行會中，連昔日戰友梁振英都幫佢唔到。發展局長陳茂波呢，去年被形容為「劏房波」，今年就變身「囤地波」，根據港大民調，佢9月時支持度淨值跌到去負46％，係港大民調創立以來新低點！最後一位就係飲茅台、食魚蛋食到廉署元氣大傷嘅前廉政專員湯顯明。佢上月被立法會帳委會罕有「痛斥」，難得佢仲有心情作詩回應，又話「沒有人完美，也沒有人是大災難。我們走在一起，但願大家各盡所能。一切都是旅程」。

★惹火組

香港電視網絡主席王維基、佔中發起人之一戴耀廷，以及揭露美英大規模監控民眾嘅中情局前僱員斯諾登，風馬牛不相及，但都有一個共通點，就喺觸及到港府同中央政府嘅神經，佢哋都算係今年嘅惹火焦點人物。

戴耀廷話搞佔中爭取2017真普選，結果由一個大學教授變成內地官媒形容嘅「極端人士」，同塔利班、台獨分子「齊名」。王維基唔止證明港人打不死，一單電視發牌事件凝聚到唔少粉絲，搞到港府四面受敵，「魔童」之稱名不虛傳。

美國人斯諾登因為大爆祖國機密而避走香港， 佢同美國嘅「貓捉老鼠」遊戲，不但令香港捲入中美外交漩渦，更令梁振英嘅特質喺美國媒體前顯露無遺——當時CY剛巧訪美，喺紐約接受彭博通訊社訪問時被問到斯諾登事件時，就對住電視鏡頭連續講咗7次「不評論個案」。