【Emily】患癌切半胃 消瘦15公斤 邵家臻術後貼相 信可走過幽谷
[2024.11.04] 發表
【明報專訊】社福界立法會前議員邵家臻患上胃癌，要入院治療，噚日佢喺社交媒體同關心佢嘅人講完成咗手術嘅近况，話手術切除咗半個胃同附近淋巴，體重跌咗15公斤，仲等緊腫瘤報告去決定需唔需要做化療。消息一出，超過3000個網民派心，資深傳媒人潘小濤、前茶餐廳老闆渣哥等留言為佢打氣。
3000網民派「心」打氣
邵家臻自上月中起喺社交媒體發布自己入院嘅相同帖文，字裏行間透露自己緊急入院，要「打大佬」，到噚日宣布確診胃癌。佢話咁做唔係想故弄玄虛，而係等事情明朗先一併交代。
入院16日 感謝伊院醫護
佢提到10月初因為腸胃不適入院，以為胃酸過多，輾轉睇過幾輪醫生後發現係胃癌。佢形容傷口癒合進度理想，唔會再即食即嘔，可以喺入院第16日出院，要特別多謝伊利沙伯醫院痛症科同外科醫護人員嘅悉心照顧，亦多謝愛佢嘅人嘅支援，「讓我在滿滿的愛中大步檻過」。
身為基督徒嘅邵家臻話自己作為一個「半無胃的人」，雖然距離完全康復仲要行好長好遠嘅路，未來亦必定要調節起居飲食，但相信主嘅恩典夠用，「有信心能走過這死蔭幽谷」。帖文引嚟超過500個網民留言祝福，Emily同大家一樣都祝願佢早日康復。
更多港聞
【Emily】大角嘴廟會開鑼 為迎「夜光龍」關燈
【明報專訊】第17屆「大角嘴廟會」噚日開鑼。福全街喺夜晚8點幾破天荒熄街燈，全港最長、色彩繽紛嘅500呎LED夜光龍壓軸登場，一條條色彩斑斕... 詳情
【Emily】搞九東發展研討會 鄧家彪送AR麻將
【明報專訊】政界不時搞研討會或講座集思廣益，工聯會議員鄧家彪（Bill）喺禮拜日（10日）將舉辦「九龍東可持續高質量發展研討會」，而佢就搞搞... 詳情
【Emily】男拔附小捷徑梯動工 校友話年內難竣
【明報專訊】拔萃男書院附屬小學毗鄰旺角東站，但無通道直接聯繫，Emily今年7月講過話校方同港鐵及政府部門商討咗15年，各方終支持由校方建一... 詳情
相關新聞
