【Emily】民航處職業開放日 模擬空管工作
[2023.04.22] 發表
【明報專訊】民航處噚日喺總部舉辦職業開放日，畀有志投身航空業或對航空業有興趣嘅學生參與，透過參加職業講座、航空教育徑導賞團及空管塔台模擬器示範等，深入了解航空科技發展及民航處唔同職系嘅工作性質。
民航處長廖志勇喺現場為參觀航空教育徑嘅學生講解航空業，仲話航空業正從疫情中快速復蘇，前景無限，今次職業開放日不但令年輕人更了解民航處及整個航空業運作，亦期望吸納更多年輕生力軍加入，為保持香港國際航空樞紐地位出一分力。
今次活動設有空管塔台模擬器示範環節，呢個模擬器採用最新投影機及影像產生器，係全球最先進嘅空管塔台模擬器之一。透過示範環節，學生可以體驗航空交通管制主任喺空管塔台工作，了解航空交通管制工作嘅樂趣同挑戰。
更多港聞
相關新聞
