【Emily】鄧炳強遊中大拍片 返應林堂嘆唔同晒
【明報專訊】保安局長鄧炳強係中大舊生,佢日前趁出席中大開學升旗禮後重遊校園,仲拍埋短片噚日放上facebook,特別提到希望同學好好珍惜在學時光,「慎思明辨,他日為母校爭光」。本身係崇基學院舊生嘅佢,除咗到訪崇基嘅飯堂同學生輔導處,仲去到佢當年所屬嘅舍堂「應林堂」。鄧炳強1987年於社工系畢業,短片中佢憶述昔日經常去嶺南運動場踢波,又會到未圓湖「思考一下」,去到崇基嘅飯堂「眾志堂」,佢提到以前成日喺嗰度流連。之後佢去到已搬至新址嘅學生輔導處同職員交談。
鄧炳強喺應林堂舍監高永雄教授帶領下參觀宿舍,一步入大堂就感慨地話「嘩唔同晒啦」,形容感觸良多。佢提到以前宿舍大堂有一列電話,當有人來電搵宿生時,房間就會有按鈕通知宿生,例如搵一號牀位宿生就按一下,餘此類推。Emily翻查資料,應林堂係中大活動較精彩嘅男生舍堂,宿生嘅迎新傳統包括喺未圓湖游水、被淋殘汁剩菜甚至「燒腳毛」等,不過局長喺片中就無講當年有無經歷呢啲活動喇。