【明報專訊】特首林鄭月娥噚日到訪工聯會「寄藥行動熱線中心」，了解該會寄藥行動運作情况。林太仲幫手聽咗幾個求助電話，並以「我係特首呀」做開場白，其中有求助港人自稱仲喺湖北，林太就叫佢講吓當地環境情况，仲話「你忍耐多陣，(政府)盡快安排專機送大家返來」。唔知呢位港人聽到林太親自接聽佢電話，會唔會都有一種「信政府，唔怕」嘅感覺湧上心頭呢？

叫滯湖北港人忍耐多陣

政府早前同工聯會合作，利用工聯會喺內地嘅服務網絡，為身在內地嘅港人送藥。服務由上月16號開始，至今已協助1194宗寄藥服務。林太噚日喺工聯會會長吳秋北、理事長黃國、立法會議員麥美娟等陪同下，去熱線中心了解運作。

林太喺社交媒體話，自己去為工聯會嘅朋友打氣，多謝佢哋為市民做事，又話接聽咗幾個市民嘅來電，了解市民受疫情嘅影響。根據片段，林太同市民傾電話時，都不忘多謝工聯會幫手。