【Emily】尚欠3人 電子煙委會流會
[2020.01.14] 發表
【明報專訊】立法會再度流會，講緊嘅係《2019吸煙(公眾衛生)(修訂)條例草案》委員會，原定噚日開會，但法案委員會主席郭偉強會後話，會議法定人數係11，但直至夠鐘都只係得8人出席，仲踭3人先夠數開會。佢話向秘書處了解過，部分議員可能因為外出視察而缺席，又話不排除有議員對條例有意見，所以唔出席會議。
郭偉強提到，會議每月一次，對於流會感到十分可惜，因為條例關乎到對電子煙、加熱煙嘅規管，兩者都係社會大眾十分關心嘅健康問題，亦關乎香港未來戒煙、禁煙及減少煙民數字等政策，期望下次開會可以有足夠法定人數。
此外，會議喺上晝10點45分舉行，但4名委員陳志全、郭家麒、朱凱廸及梁耀忠，都因為去年5月《逃犯條例》法案委員會，而被控違反立法會《權力及特權條例》，案件噚日朝早11點喺東區裁判法院提堂；同為委員嘅法律界郭榮鏗前往聲援。而噚日朝早又有一班議員去咗考察西九文化區地盤。
加熱煙關注組一眾用家代表噚日朝早喺立法會外請願，要求撤回全禁加熱煙、電子煙嘅法案。關注組話過去兩年多次去信食衛局，要求就加熱煙事宜交流、會面，但一直被無視，噚日嘅請願行動係首次接觸到食衛局代表，期望能盡快安排正式會面。
更多港聞
【Emily】監察組視察西九 林健鋒：地庫有積水
【明報專訊】西九文化區工程如火如荼，區內嘅演藝綜合劇場地盤去年中發生嚴重水浸，一度停工，立法會監察西九文化區計劃推行情况聯合小組委員會成員，... 詳情
理大開學 九成範圍重開 學生校董：5000人聯署促拆閘機
【明報專訊】香港理工大學去年11月爆發激烈衝突，校園經一個半月修復，至昨日正式開學，九成校園範圍已重開，但部分地方仍被圍封維修及有限度使用，... 詳情相關新聞
