【明報專訊】新一屆區議會噚日開始，18區區議會嘅網站亦已更新。民主派奪得85%議席，大家都雄心壯志想改革區議會。Emily就見到一個幾正面嘅開始，就係好多泛民區議員都公開手提電話號碼，有別於上一屆區議員都只提供辦事處電話號碼，令到傳媒好難搵到佢哋。不過，新一屆議員搵辦事處應該唔太容易，好多新任區議員都未有辦事處，所以聯絡冊上地址一欄暫時留空。

公開手機號碼 多人報稱全職議員

今屆區議會有好多年輕新面孔，有啲議員嘅「大頭相」同職業申報都幾有趣。連任嘅沙田區議員麥潤培嘅「大頭相」可以話係全港最「chok」，佢無用正面相，而係用一張三七分面、擺好姿勢、背後係街景嘅相。沙田區議員黃學禮則提供咗張著西裝、蹺手嘅全身照。油尖旺區議員陳梓維無再提供著波衫嘅相，而係著咗件有領恤衫加外套。

好多新任區議員都報稱職業係全職區議員，而北區區議員、民主黨林子琼就報稱職業係學生；九龍城區議員、獨立建制派張景勛報稱自己係公司董事；元朗區議員張秀賢亦報稱係Company Director。