【明報專訊】反修例風波令中港法制差異成為焦點，香港律師會每年重頭戲「青teen講場」暨「法律周」，今年主題係「三司有法」，主力向學生講解中、港、澳門法律異同，不過就主要關注私隱、電子煙等議題。 律師會每年都會為中四至中六生舉辦「青teen講場」，等佢哋透過活動探討時事，思考同法律相關嘅民生議題。籌委會主席、律師會理事湯文龍(Roden)話，特別構思涉及多個法律議題嘅短片，由學生分析、小組討論，去了解三地法制異同，議題亦同年輕人生活息息相關，例如早前「安心偷食」事件轟動全城，車cam片段涉及私隱，喺三地分別會涉及啲咩法律議題呢？亦會講吓「PTGF」(出租女友)、以至電子煙等喺唔同地方嘅刑罰。 「青teen講場」暨「法律周」開幕禮喺11月30日舉行，Roden不諱言今次相信係6月反修例風波以嚟最大型嘅青少年活動，話想有800至1000學生出席，形容非常具挑戰。
|
| |
| |
