【明報專訊】立法會議員何君堯發起聽日搞「清潔香港運動」，話要將「影響市容的垃圾撕掉，洗淨牆壁」，唔少人關注周六會否引起衝突。噚日網上就流傳一張話係福建社團聯會嘅通告(圖)，提到何君堯嘅活動得到「本會全力支持」，何君堯同福建社團聯會已分別表明呢張係假圖。

話說呢張假通告呼籲鄉會踴躍參與沙田嘅清潔活動，呼籲鄉親本着「人不犯我，我不犯人；人若犯我，我必自衛」信念積極參與。通告話活動當日朝早9點喺「沙田新城時廣場」，仲寫明下晝1點會喺沙田馬會設午宴。

何君堯好快澄清係假通告，又話有關聽日活動嘅詳情，會有義工專門直接通知參加者，無發通告。

福建社團聯會亦發聲明，話網上流傳一則以聯會主席吳換炎名義發出嘅通知話該會支持「一項社會活動」；佢哋「嚴正聲明」該活動同聯會完全無關，亦無呼籲會員參加；對有人冒充佢哋發布與事實不符嘅虛假消息深表遺憾，強烈譴責及保留追究法律責任之權利。