【明報專訊】喺反修例運動中，義務急救員不時走到示威前線為傷者治療，不屬泛民、建制嘅醫學界立法會議員陳沛然亦係其中一人，佢噚日喺facebook專頁上載市民寫畀佢嘅感謝信，內容除咗感謝佢為香港人道救援嘅努力同付出，好欣賞佢嘅工作之餘，信中特別提醒佢要好好照顧身體，「消夜就不要食雪糕了，感覺不太健康，好好保重」。
陳沛然上載信件嘅帖文話，感謝市民來信同關心佢嘅消夜，解釋食消夜原因唔係為咗食，而係因為警察清場後，都要等一陣先會有交通，亦要做賽後檢討。佢又笑言消夜唔止食雪糕，亦有好多甜品，「很快食勻十八區甜品，可以寫食評推介」。
賽後檢討等交通 「很快食勻十八區」
陳沛然少談政治，喺反修例運動中多次走到前線做救援，並喺fb簡單匯報，獲唔少網民讚好；今次亦唔係佢首次上載感謝信，唔少信都好特別，早前就有市民剪貼報紙雜誌等嘅字出嚟砌成一封信送畀佢。
