【明報專訊】「連儂隧道」成為大埔新景點，近日再有市民喺該區添上新風景。有兩個大埔學生將警察星期一(5日)喺大埔發射嘅106粒催淚彈彈頭用索帶串起，掛喺行人天橋展覽，希望提醒路人當日同一地點發生咩事。

fb唔少專頁噚日都上載咗呢張「展品」相，兩個學生喺現場留低一塊紙皮介紹，話呢啲彈頭都係喺現場收集得嚟，係警方發射眾多催淚彈嘅其中106粒彈頭，總重2285克。有網民喺「唐山大地震」嘅相關post下留言，叫兩個學生拎啲彈頭去機場展覽，擔心放喺度會畀警方沒收。另一網民就話：「子彈殼係可以當軍火。」

有網民認為呢啲催淚彈彈頭係「罪證」、「好重要嘅證物」，認為要好好保存，唔好隨便放，仲呼籲每區都要收集起呢啲彈頭咁話。