【明報專訊】元朗7．21白衣人襲擊市民事件引起全城關注，立法會議員何君堯形容施襲者係「保家衛族」，備受批評。網民不時諷刺元朗已「獨立」，笑言去元朗要申請簽證；近日就有網民將國歌改詞，改寫成由粵語唱出�鵅m元朗人民共和國國歌》(圖)，第一句就係「元朗！建設這何氏大帝國！」，另有「全力應對挑戰！萬民手執起竹棍，元朗！」，以歌詞批評元朗部分人已經自成一國，可以無視香港法律咁話。

笑言去元朗要申請簽證

呢首「元朗國歌」，頭幾句係「元朗！建設這何氏大帝國！是無懼六鄉村，衛族群力保家建國！鄉鎮同力保衛村落唱起這歌，無盡勇氣未懼軍警死守於祠堂」。去到歌曲中後段激昂位置，網民就「曲線」話元朗要建國，並諷刺白衣人拎起竹棍打人：「元朗！建家！立邦！全力應對挑戰！萬民手執起竹棍，元朗！萬民手執起竹棍，元朗！元朗，元朗，大帝國！」

有網民話恭喜元朗「終於獨立成國」，又高呼「元朗人民共和國主席何君堯萬歲」；有人話市民日後去元朗，記得要向白衣人申請簽證。有人笑言《國歌法》本地立法後，呢首國歌就會變禁歌，但亦有元朗居民對事件感到傷心，話對呢首改歌「笑唔出」。