【明報專訊】「佔中三子」之一、中大社會學系退休副教授陳健民(KM)現時喺壁屋監獄服刑。Emily早前去信了解佢嘅牢獄生涯，近日獲回信，KM話一切安好，透露女兒最近放假返香港，亦有參與反修例遊行，「(女兒)對我因爭取民主而繫獄，雖然痛心，卻完全理解；對我能克服牢獄之苦，她亦滿有信心，來信鼓勵我說：從鐵窗外望，有些人會注目泥濘，有些人會凝視星光」。KM話，希望佢安然入獄不但唔會令女兒感到羞愧，反而鼓勵佢無畏無懼、追尋夢想。 3個月讀咗16本書 KM提到，獄中環境雖然惡劣，但物質水平下降反而令佢心靈更敏感、更享受精神生活嘅滿足。佢又透露入獄至今大約3個月，已經讀咗16本書，「知識的增長帶來興奮，滿腦子思緒令我忘記惡劣的環境，甚至忘記時間」。 佔中9人定罪後都有提出上訴，Emily喺信中提出一系列問題，包括上訴理據等，KM就話到上訴嘅時候，就會聽到佢哋反對法官陳仲衡判決嘅理據。判囚4人中，港大法律學院副教授戴耀廷早前提出上訴，預計下月15日處理保釋申請。
|
| |
| |
