【明報專訊】《逃犯條例》修訂原定上周三(12日)恢復二讀，但當日爆發警民衝突，最終未有開會。網上近日流傳多條當日場面嘅影片，民建聯就上載其中一段BBC Newsnight嘅片段，指係「還原612立法會被暴力衝擊的真相」。
片段中顯示示威者衝擊立法會場面，以及有警員失去知覺，亦播出記者提出質疑示威者係咪「不負責任」、「使用暴力」嘅說話內容，民建聯喺帖文特意標記係「還原真相」。
有網民批「切頭切尾」
Emily發現，BBC官網亦有有關節目，較完整記錄當日示威者佔領馬路、衝擊立法會到警方處理手法嘅片段，記者有訪問示威者對修例嘅擔憂，示威者就話曾經舉辦和平集會，但無用；記者形容示威者衝擊成為轉捩點，其後播出多段警方點樣處理當日衝突手法嘅片段，包括多次施放催淚彈、向群眾開槍等。呢啲片段喺民建聯fb冇出現。
有網民留言質疑民建聯點解唔播足本片段，只播放其中一小段；有網民批評民建聯將片段「切頭切尾」，睇嚟民建聯所指「還原真相」，都被質疑係各取所需。
