【明報專訊】《逃犯條例》修訂全城關注，「保公義撐修例大聯盟」個聯署開始咗個多月，話已有50萬人簽名；反修例一方嘅聯署聲明亦如雨後春筍，多間中學、大專嘅校友都發起聯署，呢兩日更有人號召「全港九新界離島師奶」同「李健駕駛學校校友及教職員」現身，聯署反修例。前者嘅聲明話，「師奶每日都好盡力去完成照顧家庭的工作，無論幾疲憊，作為社會一份子，我地有責任出黎(嚟)反送中」。

師奶發起人：老套講更擔心下一代

「全港師奶」嘅聲明係由「官塘全職師奶黃彩鳳」發起，佢亦係一個兼職講師。聲明提到修例點影響師奶生活，因為內地政治審查底線隨時變，司法制度深不可測，「有內地啲師奶，唔見左(咗)律師老公好耐好耐，千里尋夫不果，審訊無得睇，係(喺)監獄都不能探」；又話「我地仲有幾多年命呀？老套啲講，更擔心既係下一代」，修例會令下一代失去保障。聲明最後警告「惡法不撤，師奶罷工，暴政必亡」。

「北角陳師奶」、「黃大仙鄭師奶」等約2000名自認師奶嘅人簽咗聯署，民陣前召集人葉志衍都有簽，佢話自己同人夾份住，角色上係一個師奶。